Ftan: directura generala per l'institut

A Ftan datti ina midada a la testa: Elisabeth Steger Vogt surpiglia a partir da l’emprim da settember 2016 la direcziun generala da l’Institut Otalpin. Ella maina actualmain l’institut per furmaziun supplementara e cussegliaziun da l’Universitad da Son Gagl.

Laschar ir video «Ina nova a la testa a Ftan»

Ina nova a la testa a Ftan

1:54 min, Telesguard dals 23.5.2016

La renumada scola en l’Engiadina Bassa survegn ina nova fatscha a la testa. A partir da l’emprim da settember surpiglia Elisabeth Steger Vogt la direcziun generala da l’Institut Otalpin a Ftan.

Elisabeth Steger Vogt Avrir maletg en lightbox.

Legenda da maletgs: Elisabeth Steger Vogt. Institut Otalpin Ftan SA

Steger Vogt ha doctorà en pedagogia ed è cussegliadra d’educaziun diplomada. Plinavant lavura ella a l’institut per furmaziun supplementara e cussegliaziun da l’Universitad da Son Gagl.

«  Per mai èsi ina gronda sfida ed in pensum fascinant da surpigliar la responsabladad generala a l’Institut Otalpin a Ftan. »

Elisabeth Steger Vogt

En ses futur professiunal vegnia ella a sa concentrar cumplainamain sin l’institut, uschia Steger Vogt. Ella sa legria sin ina lavur constructiva cun la manadra pedagogica e cun tuts collavuraturs per il bun da las scolaras e dals scolars.

Per il president dal cussegl administrativ Jon Peer è la surdada da la direcziun generala a Steger vogt in impurtant pass per posiziunar da nov la scola.

Dumber da scolars resta stabil

Suenter las turbulenzas da l'onn passà, cura che la scola aveva annunzià da stuvair serrar las portas e cura ch'i aveva lura dà ina acziun da salvament, è il dumber da scolars restà stabil.

Il president dal cussegl administrativ Jon Peer ha ditg ad RTR che la scola haja actualmain 76 scolars. Per il proxim onn da scola haja la scola 18 novas annunzias e 20 scolars che s'interessan per la scola a Ftan. Da l'autra vart bandunian 14 scolars l'Institut Otalpin perquai ch'els han a fin lur scolaziun la stad.

RR novitads 15:00