Il clutger da Ftan ha survegnì enavos puspè ses element central: il mecanissem da l’ura. Quel era per radund in mais en revisiun a Triengen giu la Bassa tar ina da be anc trais firmas en Svizra che porschan insumma anc revisiuns da mecanissems d’uras da clutger. Ina lavur che pretenda bler inschign tecnic ed oravant tut ina savida per la mecanica tradiziunala.
Ina professiun en transfurmaziun
Il batter dad in'ura ed il moviment d’in mecanissem d’ura procura anc adina mo per spir plaschair a Thomas Muff, il mainagestiun da l’interpresa da famiglia Muff SA, che reveda gia per decennis mecanissems d’ura da clutger. Quest mastergn saja dentant ina professiun en transfurmaziun tranter tradiziun ed il temp modern.
Tutgava il reveder mecanissems d’ura numnadamain ina giada tar l’affar principal da l’interpresa, è quai ozendi anc mo ina part, nua che la savida stoppia vegnir dada enavant da collavuratur a collavuratur. Ina gronda sfida, oravant tut en vista a la problematica omnipreschenta da la mancanza da persunal qualifitgà.