Sco che la Regiun Malögia rapporta da l’ultima sesida dals presidents, han quels tractà l’iniziativa «halla da glatsch regiunala» inoltrada il schaner 2018. A maun d’in questiunari eran las singulas vischnancas dumandadas dad inditgar lieus pussaivels per in tal implant.
Dimensiuns mancan
Sco ch’il president da la Regiun Malögia, Martin Aebli ha declerà ad RTR, dovria uss dentant dapli detagls areguard la cubatura, ils custs e l’organisaziun purtadra d’ina halla da glatsch. Quai avant ch’ins cuntinuescha cun las tractativas. Il comité d’iniziativa haja perquai gì da respunder pliras dumondas davart lur visiuns ed ideas. Uschia ch’ins possia insumma concretisar in project. Las vischnancas da Samedan, Zuoz, S-chanf e Bregaglia fissan tut tenor lieus pussaivels.
La conferenza da presidents ha perquai furmà ina gruppa da lavur cun Martin Aebli (Puntraschigna), Jon Fadri Huder (Samedan), Gian Fadri Largiadèr (S-chanf) e Flurin Wieser (Zuoz). Quella gruppa duai uss examinar sch’ina realisaziun d’ina halla da glatsch fiss pussaivla. L’emprim inscunter vegn ad esser suenter ils dis da Pasca, uschia Martin Aebli.
RR novitads 06:00