Siglir tar il cuntegn

Engiadina Fundà nova organisaziun Engiadina San Murezzan Turissem

La nova organisaziun vegn a surpigliar a partir dal 1. da schaner 2018 las incumbensas da l’organisaziun turistica dad oz. En in proxim pass vegn tschertgà in nov CEO.

Il nov cussegl administrativ: Ramun Ratti, Claudio Dietrich, Bettina Plattner, Markus Gschwend, Silvia Degiacomi, Andri Laager, Thomas Walther
Legenda: R. Ratti, C. Dietrich, B. Plattner, M. Gschwend, S. Degiacomi, A. Laager, T. Walther. mad

Suenter che tut las vischnancas da la regiun Malögia avevan approvà la participaziun a la nova organisaziun Engiadina San Murezzan Turissem SA ed er deliberà il chapital d’aczias da total 250’000 francs, è stada uss la radunanza da fundaziun. Quai cun la preschientscha dal notar Franco Tramèr, communitgescha la conferenza da presidents.

Ils acziunaris, ils represchentants da las vischnancas da la regiun Malögia han elegì durant quella radunanza las suandantas persunas en il nov cussegl administrativ:

  • Silvia Degiacomi (San Murezzan) e Thomas Walter (Puntraschigna) sco represchentants da l’hotellaria ed alloschament en general.
  • Marcus Gschwend (Manader da gestiun Pendicularas Grischun) sco represchentant da las regiuns da skis. El presidiescha il cussegl administrativ da la nova organisaziun turistica.
  • Andri Laager (Samedan) per il commerzi e mastergn en la regiun Malögia.
  • Bettina Plattner (Puntraschigna) per la parahotellaria
  • Claudio Dietrich (Segl) e Ramun Ratti (Zuoz) represchentan las vischnancas.

Il president communal da San Murezzan, Sigi Asprion, ha gratulà als novs commembers dal cussegl administrativ ed ha accentuà che pliras incumbensas hajan uss da vegnir pigliadas per mauns.

Nov reglament e tschertgar in CEO

Uschia hajan il nov cussegl administrativ dad elavurar in organigram cun statuts, che la radunanza extraordinaria ha lura dad approvar. Ultra da quai duess la plazza dal nov CEO vegnir publitgada proximamain.