35 represchentants e represchentantas da 15 pajais èn s'inscuntrads per discutar ideas e strategias per far valair meglier lur dretgs en lur pajais. Da la partida eran Bascs, Furlans, Ladins da las Dolomitas, Sorbs ma er Aromuns che vivan en differents pajais sco la Macedonia, la Serbia, la Rumenia, la Grezia e la Bulgaria.
Tenor il confundatur e vicepresident da la fundaziun Convivenza, Romedi Arquint èn ils Rumantschs en ina situaziun fitg cuntentaivla cumpareglià cun ils auters partenaris da l'inscunter. Las bleras minoritads n'han numnadamain nagina organisaziun da basa, nagin secretariat ed era nagins represchentants envers ils stadis e la politica.
Il pli impurtant per las minoritads en Europa è da s'unir, da betg sa fatschentar cun agens problems e da retschaiver nova energia.
A l'inscunter ch'ha gì lieu durant trais dis a Müstair han els discutà ideas e strategias per meglierar la situaziun, per chattar collavuraziuns tranter minoritads e gidar in a l’auter.
