Deponer il penel, serrar la trucla da colurs, serrar il viertgel dal clavazin. Dapi il mars na datti naginas occurrenzas e vernissaschas en las localitads dal Center da cultura Nairs, quai causa il coronavirus.
Era ils artists bandunan las localitads creativas
Normalmain datti lieu per radund 16 artistas ed artists. Ina gronda part ha però bandunà Nairs per pudair ir a chasa tar lur famiglias. Mo quatter artistas ed artists han persequità la lavur. La Fundaziun Nairs ha uss però decis da serrar las portas per la fin d’avrigl. La situaziun finanziala na permettia betg da laschar avert mo per quatter persunas.
Da la managera da cultura a la managera da crisa
Cornelia Schwab, oriunda da Berlin, maina dapi in mais la Fundaziun Nairs. Empè da sa concentrar sin cultura, è ella stada l'ultim temp managera da crisa. 30% da las entradas vegnan da mauns publics e 70% da sponsurs e privats e da las occurrenzas.
La Fundaziun Nairs spera sin in sustegn finanzial da vart dal chantun ed era da la Confederaziun – senza quel vegnia ad esser difficil da mantegnair era en avegnir il center da cultura en Engiadina Bassa.
