Il co-directur Christof Rösch va en pensiun. Perquai è la fundaziun Nairs en tschertga dad ina successiun. Rösch ha manà, furmà ed influenzà fundamentalmain la chasa d’art a Nairs, ma ussa vulan ins far in midament da generaziun, uschia il nov co-president da la Fundaziun Nairs, Michael Budliger.
Las trais pitgas restan
La chasa d’art Nairs è fabritgada sin trais pitgas artisticas. Ina giada la «Artists-en-Residence», la chasa d’art per giuvnas e giuvens artists che han la pussaivladad da lavurar vi da lur art. Plinavant datti la halla d’art cun exposiziuns d’art contemporana ed il labor da cultura, il lieu d’inscunter tranter cultura indigena e mundiala.
La situaziun finanziala – ina sfida permanenta
Tenor il nov co-president Michael Budliger èn las finanzas ina sfida permanenta. Ma la Fundaziun ha adina gì ina buna cumpetenza da finanzas, fin l’onn 2022 è stà Jon Peer (president Institut Otalpin) il responsabel per las finanzas. A partir dal 2023 ha surpiglià Andrea Fanzun (Fanzun SA Architects ed Inschigners) las finanzas, uschia èn els optimistics areguard l’avegnir.