La populaziun da San Murezzan ha ditg gea cleramain cun 892 encunter 441 vuschs al credit da planisaziun da 2,3 milliuns francs. Segl e Silvaplauna avevan ditg gea a lur cumpart dal credit da 195'000 francs e 335'000 francs gia pli baud. Tut ils custs da planisaziun muntan a 2,8 milliuns francs.
Ussa pon las trais vischnancas cumenzar cun la planisaziun concreta da la nova chasa da tgira sin l'areal Du Lac a San Murezzan. Igl è gia la segunda giada che San Murezzan votescha davart il credit da planisaziun. Oriundamain vulev'ins planisar la chasa da tgira ensemen cun Puntraschigna. Puntraschigna ha dentant refusà il credit da planisaziun e perquai han las ulteriuras trais vischnancas stuì adattar ils credits e votar anc ina giada.
60 fin 72 letgs da tgira
La nova chasa da tgira Du Lac a San Murezzan duai porscher tranter 60 enfin 72 plazzas per persunas attempadas che basegnan tgira. Quai per las trais vischnancas Segl, Silvaplauna e San Murezzan.
Sco segund lieu per ina chasa da tgira en Engiadin'Ota è en discussiun ina nova soluziun a Promulins a Samedan. Là è era la chasa da tgira existenta. La nova soluziun a Promulins stuess porscher tranter 60 ed 84 letgs da tgira.
RR novitads 12:00