Siglir tar il cuntegn
Inhalt

Engiadina Glisch verda per nov ressort e nova pendiculara en Val Müstair

La radunanza communala da la Val Müstair di cleramain gea a la vendita da terren per in nov ressort da vacanzas ed a credits da 4,4 milliuns francs per il territori da skis Minschuns.

Val Müstair
Legenda: La Val Müstair vul investir en ses futur. RTR/David Spinnler
radunanza communala
Legenda: Sala plaina: 305 votantas e votants èn sa decidids per in nov ressort da vacanzas e per investiziuns si Minschuns. RTR/David Spinnler

La Val Müstair vul il nov ressort da vacanzas «La Sassa» a Tschierv. I ha dà in cler gea cun 235 encunter 42 vuschs per la vendita dal terren a l'investur, l'interpresa Domenig Immobilien SA. Quella vul ussa fabritgar per radund 25 milliuns francs radund 60 abitaziuns cun da quai da 250 letgs.

Investiziuns per Minschuns

Cundiziun da l'investur era ch'ils implants da sport Minschuns SA fabritgan ina nova pendiculara da Tschierv si Minschuns. Ils credits per questa construcziun e per la construcziun dad indrizs per ennavar ha la radunanza communala er acceptà cleramain. Uschia investescha la vischnanca ussa 3 milliuns francs per Minschuns ed ha en pli decidì da dar la garanzia per in credit che Minschuns retschaiva dal Uffizi d'economia e turissem dal Grischun.

Anc nagina concessiun

Minschuns sto ussa concretisar il project per la pendiculara per dumandar la concessiun e la permissiun da construcziun. La Domenig Immobilien SA s'oblighescha en il contract da vendita dal terren da cumenzar a bajegiar il resort entaifer in onn suenter che la construcziun da la pendiculara ha cumenzà.