280 uffants èn vegnids tgirads l'onn 2018 en ina da las quatter canortas en Engiadin'Ota. En congual cun l'onn 2017 eran quai 17 uffants dapli. Totalmain ha la societad tgira d'uffants Engiadina quintà quasi 222'000 uras da tgira. In plus da radund 3'000 uras en congual cun l'onn avant.
Actualmain avunda plazzas
Era sche uschia bain la cifra d'uffants sco era la cifra d'uras da tgira crescha mintg'onn, haja la KIBE actualmain avunda plazzas da tgira. Quai scrivan ils responsabels en lur rapport annual. Perquai saja era la glista da spetga bler pli curta e tgi che dovria ina plazza survegnia en ils pli blers cas ina.
Questa situaziun vegn a sa calmar anc pli fitg a partir dal settember 2019. Lura avra a Puntraschigna in'ulteriura canorta cun 24 plazzas da tgira. 12 plazzas midan da Samedan e 6 da San Murezzan a Puntraschigna. Tiers vegnan ulteriuras 6 plazzas, uschia che la KIBE vegn a porscher en avegnir totalmain 102 plazzas da tgira (oz: 96).
4 canortas e mammas dal di
La societad tgira d'uffants Engiadina maina actualmain quatter canortas a Zuoz, Samedan e San Murezzan. La canorta la pli pitschna a Samedan è stada provisorica dapi il 2015 e vegn schliada cun l'avertura da la nova canorta a Puntraschigna. En pli porscha la KIBE plazzas da tgira tar famiglias dal di.
RR novitads 12:00