Las vischnancas da Schlarigna fin S-chanf percunter duessan realisar insatge a Promulins. Tenor la Glista Libra è quai la via sbagliada. Custs da gestiun favuraivels sajan tar ina grondezza da silmain 70 letgs. Il project a San Murezzan avess per consequenza che a Promulins vegniss manada ina gestiun cun mo 48 letgs, scriva la Glista libra.
I dovra in project cuminaivel per tut l’Engiadin’Ota
Tenor la Glista libra dovri ina via cuminaivla. Quai che saja dal reminent stada l’idea avant 2 onns, cura che la populaziun aveva sbittà il project Farcas, davos l’ospital chantunal.
In studi preschentà l'onn passà en ina seduta dal cussegl cirquital da l ‘Engiadin’Ota mussia che Promulins porscha plazza avunda per tut ils basegns da l ‘Engiadin’Ota. Quai che saja dal rest grev da dir, quants letgs da tgira che fan da basegn en avegnir. Oz fetschia ins quint cun 120 letgs.
Du Lac vs Promulins ?
La gruppaziun cun las quatter vischnancas en la part sura da l’Engiadin’Ota, suttamettan a las radunanzas communalas las proximas emnas ina dumonda da credit per la planisaziun d’ina chasa da tgira decentrala a San Murezzan.
Entant cuntinueschan las autras 7 vischnancas da Schlarigna fin S-chanf cun las tractativas per ina chasa da tgira Promulins a Samedan. Emprimas decisiuns duain vegnir tratgas da zercladur.
Segl cumenza...
La vischnanca da Segl decida sco emprima en chaussa. Sche in dals quatter lieus avess da sbittar il credit, avess ins da turnar puspè tar il cumenzament, ha declerà il president communal da Segl, Christian Meuli.
Sche tut va dentant tenor plan, vess la dumonda da credit per ina chasa da tgira decentrala a San Murezzan, da vegnir d’atun dal 2018 avant il pievel.
