Siglir tar il cuntegn

Header

video
Grond interess per Academia Engiadina tar scolars da Ftan
Or da Actualitad dals 23.07.2015.
laschar ir. Durada: 1 minuta 55 Secundas.
cuntegn

Engiadina Grond interess per Academia Engiadina tar scolars da Ftan

Las 90 scolaras e scolars da l’Institut Otalpin Ftan han da chattar ina nova scola per il proxim onn da scola. Quai suenter ch’il è enconuschent ch’il gimnasi en Engiadina Bassa ha da serrar sias portas per dal bun.

Las sis scolas che vegnissan en dumonda per ils gimnasiasts e ch’èn en vischinanza da l’Institut Otalpin Ftan èn sa preschentadas oz gievgia cun ina curta descripziun als scolars ed als geniturs.

Fin da l'Institut Otalpin

Avrir la box Serrar la box

Dapi mardi èsi cler che er l’ultima acziun da salvar la scola n'ha purtà nagut. Il manaschi da la scola tradiziunala vegn serrà per immediat, quai suenter passa 200 onns.

Las raschuns: memia paucs scolars ed ina memia pitschna occupaziun da l’internat. Er il fatg che Swiss Olimpic ha retratg il label ha però gì effects negativs sin il marketing.

Numnadamain la Scola sportiva Champfèr, l’Academia Engiadina Samedan, il Lyceum Alpinum Zuoz, la Scola media evangelica Schiers, il Gimnasi da sport Tavau, e la Scola media alpina Tavau.

Lunga colonna avant stanza da l’Academia Engiadina

Suenter la curta preschentaziun hai dà en singulas stanzas discurs persunals tranter ils directurs ed ils scolars cun lur geniturs. Tenor la colonna da spetga davant la stanza da l’Academia Engiadina a Samedan è da far quint che la gronda part dals scolars sa decidan per la scola media in Engiadin’Ota.

Academia Engiadina avess plaz

Sco quai ch’il directur da l’Academia Engiadina Samedan, Ueli Hartwig, ha declerà durant la preschentaziun a Ftan, surpigliass l’Academia gugent tut la scola media spezialisada en in pachet.

Ils scolars han uss da sa decider ensemen cun lur geniturs en tgenina scola ch’els cuntinueschan il proxim onn da scola.

Artitgels legids il pli savens