Il president communal da S-chanf, Gian Fadri Largiadèr, na stat betg pli a disposiziun per in segund trienni. Sco quai che Gian Fadri Largiadèr ha ditg oz envers RTR, na sa mettia el betg pli a disposiziun or da motivs privats. Cun el han demissiunà total set persunas da la suprastanza. Vinavant han la chanzlista ed il contabilist visà la plazza.
Interess per las plazzas vacantas è qua
A la radunanza communala da gievgia saira èn vegnidas annunziadas las nominaziuns per ils posts vacants. E l’interess per quests posts è avant maun. 7 persunas èn prontas da s’occupar da las differentas caricas politicas en vischnanca. Ulteriuras nominaziuns èn anc pussaivlas enfin ils 11 d’october.
Campell resta en cursa per il presidi
Malgrà la situaziun speziala che bunamain l'entira suprastanza demissiunescha, resta Riet Campell, l'anteriur directur da Swiss Snowsports, tar sia decisiun da candidar per il presidi. Tenor el èsi pli problematic che la chanzlista ed il contabilist han visà la plazza. En cas ch’el vegnia elegì sco president, saja quai l’emprima chaussa ch’el stoppia schliar.
Selvicultur è vegnì dispensà
E tar tut questas midadas vegn er anc tiers, che S-chanf haja dispensà ad interim il selvicultur e ch’i dat in’examinaziun administrativa tras in’instanza externa. Er tar quest cas na datti nagins detagls davart ils motivs.
Uschia bandunan uss en ina giada 10 persunas lur uffizis tar la vischnanca da S-chanf.
Ils 20 d’october tschernan ils da S-chanf la nova suprastanza.
RR actualitad 17:00