Ellas èn fitg raras, be mintga pêr onns datti puspè ina en il glatsch etern. Ina grotta da vadretg. En Engiadinia datti quest enviern dafatta duas - ina en la Val Roseg e l'autra en il vadretg da Morteratsch. La grotta en il vadretg da Morteratsch è in sistem da cuvels. En ils cuvels èsi glatsch che è millis dad onns vegl.
Ils dus guids da muntogna Marcel Schenk e Berni Hauser èn rampignads en la grotta per explorar nouvs cuvels. Els han chattà in cuvel che è fitg profund cun radund 150 - 180 meters.
Glisch dal glatsch
Il glischar dal glatsch en il cuvel deriva dad in vent che zuffla adina puspè tras il cuvel. Quel glima il glatsch permanent e perquai è il glatsch era finischem.
La visita en la grotta è in eveniment spezial. Ins duai però entrar en la grotta mo cun in guid da muntogna che enconuscha las circumstanzas ed ils ristgs.
