Siglir tar il cuntegn
Inhalt

Engiadina Gruppa d'interess puschlavina vul surpigliar pendiculara Lagalb

Las possessuras da l'implant, las pendicularas Engadin St. Moritz Mountains èn en discussiun gia dapi in mez onn cun la gruppa d'interess. Questa vul surpigliar la gestiun ed è uss vidlonder da sclerir sche quai va. Ella na vulan betg acceptar la fin da la Lagalb.

Pendiculara da Lagalb.
Legenda: Pendiculara da Lagalb. Keystone

La vischnanca da Puntraschigna è pronta da discurrer cun la gruppa d'interess. Sco gruppa d'investiders na possia ins dentant betg encleger ella, di il president communal Martin Aebli. En la charta dumonda la gruppa numnadamain era per sustegn finanzial.

Proceder nunusità

Martin Aebli è in zic surprais da la charta. Enfin tar questa na haja el udì nagut da quellas persunas ed era la charta hajan els tramess via in advocat. Aebli vul sco proxim chattar in termin per discurrer cun las persunas. Da la partida vegn era ad esser Poschiavo, ch'ha era survegnì ina charta da la gruppa.

Gia dapi in mez onn en tractativas

Tenor il president dal cussegl administrativ da la Engadin St.Moritz Mountains SA sajan els schon dapi in mez onn en tractativas. Ils nums da las persunas en la gruppa d'interess na ha el betg tradì, sin giavisch da questas. Ma i sajan persunas d'affars, uschia Wieser.

Decisiun fin als 20 december

Fin che la stagiun da la Lagalb cumenzà, vul Wieser ina resposta concreta da la gruppa d'interess. Schebain ella vul surpigliar la gestiun u betg. Betg cun in contract suttascrit, ma cun ina decleraziun a bucca.

L’avrigl passà aveva l’Engiadina Mountains SA fatg a savair ch’ella serria la pendiculara da Lagalp la fin da la stagiun 2015/2016. Quai pervi da deficits che n’eran tenor la direcziun betg supportabels.

La pendiculara da Lagalb exista dapi l'onn 1963. Investiziuns eran l’ultima giada vegnidas fatgas il 2007, numnadamain per ina summa da radund 7 milliuns francs. Dapi lura ha l'indriz generà ina perdita da passa 10 milliuns francs.