Gudagnà cumbat - famiglias indigenas e vischnanca pon bajegiar

Suenter 3 onns cumbat pon 7 famiglias indigenas e la vischnanca da Silvaplauna far viva. Il Tribunal federal ha decidì che la dumonda da construcziun, inoltrada l’onn 2012 per ina surbajegiada cun 3 chasas, è valaivla.

Veglia chasa communala a Silvaplauna Bild in Lightbox öffnen.

Legenda da maletgs: Qua duain las chasas vegnir bajegiadas. RTR, V.Rominger

Ina possessura d’ina segunda abitaziun aveva fatg plant cunter il project. I sa tracta d’in project da totalmain 10 milliuns francs.

Il project

Ina chasa cun 7 abitaziuns per dar a fit ad indigens bajegiass la vischnanca da Silvaplauna ed investiss per quai 4,1 milliuns francs. Las autras 2 chasas vegnan bajegiadas da 7 famiglias indigenas. En tut èn gia vegnids investids radund 350’000 francs en il project.

Via anc lunga

Anc è la via fin tar la realisaziun dentant lunga. Da las 7 famiglias che vulevan bajegiar èn restadas mo pli 5 ed er tar quellas na san ins betg, sche tuttas vulan anc esser da la partida.

Nova opposiziun?

Sco quai ch’i para è ina dunna indigena ussa vidlonder da ramassar suttascripziuns per ina procedura da reponderaziun. Vul dir per anc ina giada decider davant radunanza communala sch’ins vul lubir las chasas u betg. Quai n’ha la presidenta communala da Silvaplauna Claudia Troncana dentant betg confermà.

L’onn 2012 aveva la populaziun ditg gea a la dumonda da la suprastanza communala, davart in credit da 4,1 milliuns francs per il project.