Siglir tar il cuntegn
Inhalt

Engiadina Halla da chavaltgar a San Murezzan duai daventar halla d'event

Sco quai che la vischnanca da San Murezzan communitgescha, è il project «Reithalle Futura» da Max Schneider e Roland Hinzer ina soluziun ch'ins savess sa metter avon per utilisar enturn la halla da chavaltgar. Dapi che questa è serrada or da motivs da segirezza, tschertg'ins ina soluziun.

halla da chavaltgar
Legenda: La halla da chavaltgar a San Murezzan è serrada dapi il 2013. RTR

L'onn passà ha la vischnanca da San Murezzan scrit or public ina concurrenza co nizzegiar en futur la halla da chavaltgar. Mo trais popostas sajan vegnidas inoltradas, communitgescha la vischnanca uss.

Quai na cuntentia betg, ha ditg il president communal Sigi Asprion. I mussa dentant la situaziun economica difficila. Chattar in investur saja sco i para nunpussaivel.

Project «Reithalle Futura»

Il project inoltrà che prevesa ina halla d'event n'è betg nov. Schon l'october 2016 era quel ina giada sin maisa. Entant n'è dentant vegnì inoltrà nagut meglier.La suprastanza communala e la cumissiun «halla da chavaltgar» vulan perquai perseguitar l'idea.

Segir n'è anc nagut

Anc manca numnadamain la part la pli impurtanta: la finanzaziun. Quella ston ils iniziants dal project manar sin il pli tard entaifer in mez onn, ha ditg Sigi Asprion. Lura vul la vischnanca decider definitivamain co vinanvant cun la halla da chavaltgar.

RR actualitad 12:00