Lur stil è innovativ e tradiziunal. In stil grischun, sco cusseglier guvernativ Martin Jäger numna el a la vernissascha da l'exposiziun speziala. Ins haja vulì mussar ch'ins construescha en Grischun auter che a Turitg u a Basilea.
Ils trais impressaris ed architects, surtut il pli giuven dad els han influenzà la cultura da construcziun e la cuntrada grischuna da 1850 fin 1950. Surtut en Engiadina èn lur construcziuns prominentas.
Tschients fabricats
Ils trais Nicolaus Hartmann's han construì hotels, chasas da scola e d'abitar, staziuns, stabiliments da sport, baselgias e museums. Uschia èn tranter auter ils hotels Kulm e la Margna a San Murezzan, Castell a Zuoz u il Waldhaus a Vulpera or da lur pennas. La halla da chavaltgar e la chasa da scola a San Murezzan han els construì, ed era il museum engiadinais ed il museum Segantini. In dals pli enconuschents fabricats è l'edifizi d'administraziun da la Viafier Retica a Cuira.
Exposiziun sin basa d'in cudesch
Kristiana Hartmann è l'abiadia dal pli giuven dals trais architects Nicolaus Hartmann. Durant plirs onns ha ella retschertgà ses perdavants. Resultat è in cudesch che metta en relaziun las lavurs dals architects cun il temp da lur construcziun.
Uschia è l'introducziun dal turissem en Grischun stada la basa per la lavur dals Hartmann's e grazia al turissem han els pudì far part da quest spert da pionier che regnava quels onns. Il temp principal da ses perdavants saja stà da 1896 fin 1914, uschia Kristiana Hartmann.
L'exposiziun en il Museum Engiadinais a San Murezzan dura anc enfin ils 20 d'october 2019.
RR actualitad 17:00