Las cundiziuns da basa per surpigliar ed avrir in hotel na sajan betg idealas. Tuttina ha l'investider Zülfikar Güzlgün ed l'architect Jon Armon Strimer decidì da cumprar l’hotel Chalamandrin a Ftan sur Scuol.
Cun la cumpra vain nus vulì evitar ch’i dettia abitaziuns ord quest hotel.
Lieu d'inscunter
L’hotel duai daventar in lieu d’inscunter per giasts ed indigens. A curta vista na fetschian ins betg quint cun in grond gudogn. Impurtant saja da porscher in bun product per la regiun. Er la situaziun malsegira pervia da la mancanza da persunal u ils auts pretschs d’energia na fetschian betg gronds quitads a Zülfikar Güzlgün.
Ensemen cun il spezialist e mainagestiun Paolo Simão sajan els in bun team e sche lur famiglias gidian tar la lavur da mintgadi possia l’affar funcziunar bain. Impurtant saja da rivar bain tras la stagiun d’enviern uschia ch’ins possia ramassar experientschas e decider la primavaira co vinavant.