Siglir tar il cuntegn
Inhalt

Engiadina Hotel Kulm e Palace na vulan betg gestiunar l'hotel da sanadad

L'iniziant dal project "Serletta Süd" che prevesa ina nova Clinica Gut ed in hotel da sanadad ha fatg la proposta als adversaris dal project ch'els pudessan manar l’hotel. Nus bajegiain l’hotel uschia sco quai ch'il gestiunari vul, quai ha ditg Werner Vogt a chaschun d’ina maisa radunda.

Organisà era la runda da discussiun dal comité «Ja zum Kompromiss» cun l’idea da dar la pussaivladad als commembers dal comité da far dumondas a l'iniziant Werner Vogt. Interessà ha oravant tut co ch'in cumpromiss guardass lura or. E la resposta da Vogt era clera: ina proposta ch’els fan ed hajan era gia fatg il passà è che l’hotel Kulm e/u Palace pudessan gestiunar il nov hotel da sanadad. Il problem fiss schlià, di Vogt. Els bajegian mo l’hotel uschè grond sco quai ch'il gestiunari decida.

Nagin interess da vart dals hotels

Era preschent a la maisa radunda era il directur da l’hotel Kulm Heinz E. Hunkeler. Entant ch'el ha ier betg piglià posiziun ha el oz ditg en num da l'hotel Kulm e Palace che quai saja nagina opziun. Da manar ina tala proposta curt avant la votaziun als 18 october saja betg serius. Ils hotels Kulm e Palace na sajan betg activs sin il sectur dal turissem da sanadad ed era hajan els betg gestiuns da tut l'onn. Manar in hotel da sanadad na vegnia perquai betg en dumonda. Ultra da quai saja questa proposta mo tactica dals iniziant per uschè gudagnar vuschs.