Siglir tar il cuntegn

Engiadina Hotel Piz Buin a Guarda en novs mauns

La successiun per in da totalmain dus hotels a Guarda è reglada. L’hotel Piz Buin vegn surdà en novs mauns. In midament dentant cun impediments.

Legenda: Guardar il video «L'onn 2007 ha Guarda fatg in stritg tras il quint dals hoteliers». Durada 3:25 minutas.
Dals 19.10.2007.

11 hotels èn sin la glista da vendita sulettamain en la regiun Engiadina Bassa e Val Müstair. En la vischnanca da l’Uorsin han ins però chattà ina soluziun per reglar la successiun d’in hotel. Ils possessurs da l’hotel Piz Buin a Guarda, Natalia e Hans-Peter Rubi, han chattà in nov fittadin per lur gestiun.

Investiziuns basegnaivlas

L’hotel Piz Buin, construì il 1947, è entant en in stadi ch’ins ha d’investir raps, per cuntinuar cun la gestiun sin il medem livel. Las investiziuns èn per part urgentas. Ma las bancas sajan fitg restrictivas cun dar raps per investiziuns en hotels, ha declerà l’hoteliera da Guarda, Natalia Rubi.

Chattà soluziun per cuntinuar

Grazia al model ch’il pèr Rubi ha elavurà per il futur da l’hotel Piz Buin, è la banca stada pronta da sustegnair il project. En tut vul ins investir 800’000 francs en la chasa a l’ur da la vischnanca da Guarda cun totalmain 20 stanzas per giasts.

Ils fittadins èn impiegads

Il model che ha persvadì la banca prevesa, che Diana e Peter Pfiffner da Sax en il chantun da Son Gagl, daventan novs fittadins da l’hotel Piz Buin. Els na lavuran dentant betg sin agen quint. Els èn emploiads da l’hotel. Patruns restan vinavant Hans-Peter ed Natalia Rubi, schebain ch’els sa retiran uss pass per pass cumplettamain da l’affar.

Las lavurs da renovaziun èn entant bunamain finidas, la fatschada da l’hotel ha ina nova colur, las chombras èn renovadas uschia che la clav po vegnir surdada venderdi als 20 matg 2016 als novs manaders da l’hotel Piz Buin a Guarda.