Siglir tar il cuntegn

Header

video
Hotel Reine Victoria festivescha reavertura
Or da Actualitad video dals 24.11.2015.
laschar ir
cuntegn

Engiadina Hotel Reine Victoria festivescha reavertura

In dals plis vegls hotels a San Murezzan Bagn vegn actualmain preparà per la nova stagiun d’enviern. Durant ils ultims 40 onns era l’hotel da quatter stailas la dimora dal Club Med e pli tard da la gruppa taliana Tivigest.

Nov fittadin da l’edifizi dal 1874 è la societad Laudinella. Quella aveva l’intenziun da renovar ed engrondir l’Hotel Laudinella per 65 milliuns francs e duvrar il Hotel Reine Victoria per surmuntar il temp da fabrica. Ils plans han ils responsabels dentant spustà sin suenter il campiunadi mundial da skis a San Murezzan l’onn 2017.

Glischentar l’hotel

Il contract cun ils possessurs da l’Hotel Reine Victoria è restà uschia che la societad ha decis dad avrir puspè las portas da la chasa istorica. Perquai han ins pulì e renovà levamain las 144 stanzas ch’èn sparpagliadas sin 5 plauns. La gronda part da las lavurs hajan ins pudì far cun atgna glieud ha declerà la vicedirectura da l’Hotel Laudinella, Andrea Cologna.

Manar dus hotels en ina

Ina da las sfidas che la societad Laudinella ha uss è da manar las duas chasas il medem mument. Actualmain lavuran 160 emploiads en in dals dus manaschis. Per la gestiun da l'Hotel Reine Victoria quintan ins cun 30 persunas che lavuran da l'autra vart da la Via dal Bagn a San Murezzan. Nova directura da l'hotel è Mirjam Bolt.

L’Hotel Reine Victoria ha quatter stailas e vegn manà a partir dals 8 da december 2015 sco garni. Cunquai che l’hotel sa chatta be da l’autra vart da la via, pon ils giasts trair a niz la purschida da l’Hotel Laudinella cun ses 6 differents restaurants.

Artitgels legids il pli savens

Scrollar a sanestra Scrollar a dretga