Hotel Tarasp - Nagina idea concreta – ma ina visiun

Andrea Fanzun, il CEO da la firma Fanzun SA da Cuira ha cumprà l’hotel ensemen cun ses frar Gian ed in ulteriur architect. Tenor els saja in tal object ina vargugna per ina vischnanca.

Sco emprim ina giada duai dar là in prà verd, impurtant saja che quel stabiliment en decadenza svanescha e na ruina betg pli il maletg dal vitg, manegia Andrea Fanzun.

Ils frars Fanzun han ina stretga relaziun cun Tarasp. Il bab era da Tarasp. Els vegnivan da pli baud fitg bler a visitar il tat e la tatta.

Investur Talian ha pers l’interess

Walter Vismara aveva cumprà l’hotel cun l’idea da vulair realisar ina sort resort, ma quella idea n'è mai vegnida realisada. Suenter 10 onns han ussa ils frars Fanzun ensemen cun Roger Boltshauser, in ulteriur architect da Turitg, cumprà l’Hotel Tarasp.

Nagin idea – ma ina visiun

La finamira principala saja da strair giu quest object decadent, suenter lura ins ha temp per studegiar bunas ideas. La substanza existenta dal object ha patì ferm causa donns dad aua, perquai vegn l'entir object stgarpà giu.

Quella zona per la hotellaria na permetta ni la realisaziun dad abitaziuns per indigens ni da segundas abitaziuns. La visiun dad Andrea Fanzun è da vulair realisar forsa in lieu d’inscunter ed ina sort center per la populaziun da Tarasp cun ustaria, singulas stanzas per giasts ed in bigl.

Eventualmain avessan ins era la pussaivladad dad integrar la butia dal vitg, ma quai èn per il mument mo visiuns, agiunta Andrea Fanzun.

Or da l'archiv