Dapi il venderdi passà è l’istorgia da l’hotellaria en Engiadina Bassa per in chapitel pli ritga. Il venderdi è stà a Scuol l’ingiant da l’Hotel Villa Silvana e l’Hotel Villa Maria da Vulpera. Per passa 1,8 milliuns francs èn ils dus hotels or dal falliment da la Alpin Lodge Investment GmbH Vulpera ids a la banca cooperativa WIR.
Quai èn ils facts schurnalistics.
Mia perspectiva persunala
Per mai ha quest’istorgia dentant anc in’autra vart – quella persunala sco part da la famiglia Jaeger, che possedeva durant stgars 50 onns in dals dus hotels, la Villa Maria.
Igl era dal 1970 che mes geniturs Erich e Geraldine Jaeger èn vegnids per l’emprima giada en l’Engiadina Bassa ed han scuvert la Villa Maria. Quella fascheva part da l’imperi d’hotels da la famiglia Pinösch a Vulpera.
Da las duschas sin l'etascha a 14 puncts da Gault Millau
Mes geniturs han fatg da la pensiunetta cun duschas d’etascha in hotel cun renum, giasts fidels e 14 puncts en la bibla culinarica Gault Millau. Ils onns passavan ad in passar e plaun plaunet sa midavan las relaziuns economicas. Las forzas gievan al main ed en ils onns 2000 avessan mes geniturs gugent vendì la Villa Maria.
-
Bild 1 von 6. Deserta e fraida. Cun la Alpin Lodge Investment GmbH a Vulpera è la Villa Maria ida en falliment l'onn 2022. Bildquelle: RTR.
-
Bild 2 von 6. La Villa Maria e jau. Quest hotel ha accumpagnà mai durant quasi 50 onns da mia vita. Bildquelle: RTR.
-
Bild 3 von 6. Ina bun'adressa. Mes bab aveva survegnì per sia cuschina 14 puncts da Gault Millau. Bildquelle: RTR.
-
Bild 4 von 6. Ina zic nostalgia è restada. Mes bab Erich Jaeger e l'ultim prospect ch'el e sia dunna Geraldine avevan laschà far per la Villa Maria. Bildquelle: RTR.
-
Bild 5 von 6. Il medem destin. Er l'hotel Villa Silvana a Vulpera è pertutgà dal falliment e l'ingiant. Bildquelle: RTR.
-
Bild 6 von 6. Co vinavant cun ils hotels a Vulpera e Tarasp? Mo la Villa Post ed il Schlosshotel Chasté èn anc averts. Bildquelle: RTR.
La vendita era dentant pir pussaivla il 2020. Lura è cumparì il cuschinunz austriac Johann Brugger. Cun sia Alpin Lodge Investment GmbH n’ha el betg be cumprà nossa Villa Maria, ma er l’hotel Villa Silvana a Vulpera. Success economic n'ha el dentant betg gì. Gia dus onns pli tard è sia societad ida en falliment – e cun ella la Villa Silvana e «nossa» Villa Maria.
Nagin commentari tar l'avegnir
Las duas villas èn tenor infurmaziuns actualas uss en il possess da la banca cooperativa WIR cun sedia principala a Basilea. Tge ch’i vegn a succeder cun ils dus hotels n’ha il represchentant da la banca betg vulì tradir a mai. Nagin commentari – e sco la regiun Engiadina Bassa vegn er jau a stuair star cun mirveglias tge che succeda en l’avegnir cun l'hotellaria a Vulpera.