Siglir tar il cuntegn
Inhalt

Engiadina Hotels pon realisar ina part abitaziuns

Scuol vul sustegnair ils hotels. Quels duain pudair fabritgar abitaziuns gestiunadas en lur manaschis.

Scuol Palace
Legenda: Il Scuol Palace pudess profitar da la nova lescha a Scuol RTR/David Spinnler

Las abitaziuns gestiunadas duain esser in sustegn per ils manaschis d'hotel. La nova lescha communala prevesa che hotels pon realisar en ina part da la chasa abitaziuns per vender. La premissa è che las abitaziuns vegnan gestiunadas.

Finanziar novs letgs d'hotel via abitaziuns gestiunadas

Ils 10 da zercladur votescha il suveran da Scuol davart la nova lescha da zonas d'hotels. Quella prevesa ch' ils hotels existents han la pussaivladad tar ina renovaziun da fabritgar abitaziuns sco part da l'hotel. Quellas abitaziuns pon els vender. Las abitaziuns ston dentant esser gestiunadas cun tut l'infrastructura d'in hotel. Tar hotels che vegnan renovads, pon ins realisar cun 1/3 dal spazi abitaziuns. Tar in hotel che vegn fabritgà nov, pon ins fabritgar sin 20% dal spazi abitaziuns.

Il Scuol Palace po profitar

L'hotel Scuol Palace è il prim hotel che po profitar da la nova lescha sche quella vegn approvada dal suveran. La part da las stanzas d'hotel è pli u main renovà a fin. En la part a l'ost duai quai dentant dar abitaziuns. Profitar da la nova lescha pudessan dentant era auters hotels sco il project d'hotel a Rachögna a Scuol. Sche quel vegn realisà u betg, n'è dentant anc betg enconuschent.

RR actualitad 11:00