Siglir tar il cuntegn

Header

Navigaziun

Descripziun dal project
Legenda: Uschia vesa l'idea per spendrar il glatscher or. CDM / HTW Cuira
cuntegn

HTW Cuira Spendrar glatschers entras naiv

L'agentura per promoziun d'innovaziun «Innosuisse» sustegna in project da pilot da la HTW Cuira. Concret vai per in nov indriz da far naiv. Quest indriz pudess tranter auter era gidar a salvar glatschers.

«Innosuisse» surpiglia la mesadad dals 2,5 milliuns francs per il project. Ils ulteriurs daners vegnian da partenaris d'industria. Il project vegn a cuzzar 30 mais e cumenza l'avust. Il substitut dal manader da project Dieter Müller è levgià dal sustegn.

Senza il sustegn finanzial n'avessan nus probabel betg pudì realisar il project da pilot.
Autur: Dieter MüllerSubstitut dal manader da project

Il project che survegn sustegn è concret in'indriz da far naiv artificiala. Quel penda vi da suas ed è cun quai movibel.

 Visualisaziun da l'apparat d'ennaiver, il project da pilot da la HTW Cuira.
Legenda: Project da pilot da la HTW: Visualisaziun da l'apparat d'ennaiver. MAD

Vinavant duai l'indriz duvrar fitg pauca energia. Sco ch'il substitut dal manader da project Dieter Müller ha ditg envers RTR, ramassan els l'aua per far naiv en in punct pli aut sco nua ch'els vulan ennavar. Uschè pon els nizzegiar la differenza d'autezza per spargnar energia.

L'avantatg en congual cun auters indriz: Cun quai ch'el penda vi da suas po ins er duvrar l'indriz en lieus cun terra pauc stabila.

Finamira: Salvar il glatscher da Morteratsch

L'avust cumenza la HTW a lavurar vinavant vi da l'indriz. Proxim onn vulan els far emprims tests cun quest indriz. Nua ch'els fan quels tests n'è anc betg cler. Ina pussaivladad è da far els sin il glatscher da Corvatsch. Suenter la fasa da test vulan els construir l'indriz sin il glatscher da Morteratsch.

L'indriz pudess numnadamain gidar a spendrar glatschers. Il project prevesa da «reciclar aua da naiv». Il plan è da rimnar l’aua da naiv durant la stad e da puspè turnar l'aua al glatscher en furma da naiv durant l’enviern. L'indriz da far naiv duai esser independent dal terren e funcziunar senza electricitad.

RR novitads 14:00