Siglir tar il cuntegn
cuntegn

Engiadina «I dat memia paucas innovaziuns en Engiadina»

Christian Wenger, referent a la quarta ediziun dal Forum da sanadad e turissem a Puntraschigna, ha intimà ils preschents cun ses referat da ristgar dapli, d’investir pli svelt en projects innovativs.

sala cun glieud vid maisas
Legenda: Grond interess per la 4. ediziun da la Conferenza sanadad e turissem a Puntraschigna. RTR, Anna Caprez

Il president dal cussegl administrativ da la Aevis Victoria SA, in’interpresa che è spezialisada en il sectur da sanadad, ha analisà en occasiun da la «Conferenza sanadad e turissem» la situaziun actuala da l’Engiadina. Tenor Christian Wenger manchia dentant a la val in magnet che attira. Il image char tras la marca San Murezzan collian ins adina puspè cun l’Engiadina. E las stagiuns cun hotels serrads durant plirs mais, sajan memia curtas.

Christian Wenger che ria
Legenda: L'interprendider Christian Wenger ha analisà la situaziun actuala en Engiadina. RTR, Anna Caprez

Investir en ils giuvens

L’interprendider turitgais è persvas ch’ins na duess betg be sa concentrar sin la generaziun pli veglia a reguard purschidas en connex cun sanadad, mabain attrair surtut glieud giuvna en Engiadina. Quai per exempel en cumbinaziun cun in’acziun d’in festival da sanadad.

Schanza per il Grischun

Il potenzial en il sectur turissem da sanadad saja avant maun, uschia Philipp Gunzinger il manader da la gruppa directiva per il turissem da sanadad dal Grischun che è operativa dapi il mars 2017. Ils pass strategics saja la gruppa vi dal evaluar anc fin il 2020. Durant quel temp ha da vegnir sviluppà concepts, promovidas instituziuns ed er coordinà tut ils projects en quel connex.

Sin buna via

La bilantscha intermediara che Gunzinger po trair suenter in onn e mez saja buna. Che la gruppa directiva haja entant inizià ina collavuraziun cun il Forum d’economia dal Chantun che ha lantschà il project Sana per Reatia, la basa per cuntinuar cun la lavur. Entant s’hajan er gia annunziads blers interessents ed investiders tar la gruppa directiva, uschia Philipp Gunzinger. Per el è dentant clar ch’i sa tracta d’in martgà da nischa cura ch’ins discurra da turissem da sanadad en il Chantun Grischun.

RR novitads 17:00