I renda da s’engaschar per ina chaussa che stat a cor

David Spinnler, correspundent Engiadina

David Spinnler, correspundent Engiadina. Bild in Lightbox öffnen.

Legenda da maletgs: David Spinnler, correspundent Engiadina. RTR

Exact oz avant in mais – ils 21 da fanadur las 11:34 è vegnì il mail culla novitad che l’Institut Otalpin stoppia serrar las portas per adina.

Ed ussa guarda tut or auter: Nova glieud a la testa, nova speranza – ed in nov onn da scola che po cumenzar cun radund 80 scolars.

Tuns plain speranza gia avant

Cler: segir che il salvament funcziuna per propi ed a lunga vista na po nagin esser. Las finanzas bastan per in tempet e la scola na po betg surviver sche ella resta uschia sco ella è oz. I na resta nagut auter che dad avair fiduzia en la nova gruppa strategica che vegn era pli u main ad esser il nov cussegl administrativ. La gruppa cun nums che resunan: Beatrice Tschanz, Gerhard Pfister, etc.

Ma tuns plain speranza avevi gia dà tar la davosa midada a la testa dal cussegl administrativ cura che Johannes Flury aveva surpiglià la batgetta da Rolf Dubs. E gnanc in onn pli tard la nova: nus stuain serrar las portas.

La populaziun è stada nà

Insatge è dentant tut auter questa giada. Questa giada è stada nà la populaziun ed ha ditg: nus na vulain betg che l’Institut Otalpin sto serrar las portas. Ina gruppa da geniturs ed autra glieud ha fatg si las mongias ed ha ramassà suttascripziuns e raps enfin che il cussegl administrativ ha stuì dir: na, nus na stuain tuttina betg serrar las portas. Quest senn d’exclamaziun da la populaziun ha era dà schlantsch e sustegn als politichers da dir. Ussa sto capitar insatge dal tuttafatg nov. Nus stuain salvar l’Institut.

Trair a niz il schlantsch

Senza la vusch da la populaziun avessan ils politichers acceptà la decisiun da serrar l’Institut Otalpin. Quest schlantsch ston ins ussa trair a niz. Enfin che la scola media da l’Engiadina Bassa è puspè sin il binari dal success.

Igl è ina bellezza che quest exempel mussa: i renda da s’engaschar per ina chaussa che stat a cor. Simpel, onest e cun persvasiun.