Engiadina - Il bler pajan ins per abitaziuns da vacanzas a San Murezzan
Tgi che vul cumprar en las Alps in'abitaziun da vacanzas sto pajar il pli bler a San Murezzan. Quai mussa in studi da la banca gronda svizra UBS ch’ha analisà il martgà d'immobiglias en il spazi alpin da la Svizra, l'Austria, la Frantscha e l'Italia.
A San Murezzan custa in meter quadrat terren sulom da bajegiar en media radund 14'000 francs, communitgescha la banca gronda UBS. Sin plazza dus vegn Gstaad en il chantun Berna, sin plazza trais suonda Verbier en il chantun Vallais. Ordaifer la Svizra vegn pajà il pli bler per abitaziuns da vacanzas a Courchevel en Frantscha. Là custa in meter quadrat radund 12'000 francs, scriva la UBS.
