Siglir tar il cuntegn

Header

video
Il cor da jodladers d'Engiadin'Ota
Or da RTR dals 02.10.2016.
laschar ir
cuntegn

Engiadina Il chant da jodel è ina chaussa da e per il cor

L'inscunter da jodladers dal Grischun è stà questa giada en l'Engiadina. Dasper il sa vesair puspè ina giada è il chant stà en il center da la fin d'emna a Puntraschigna.

Bun 260 jodladers e jodladras èn viagiads en l'Engiadina per l’inscunter annual. Organisà l'inscunter ha il cor da jodladers indigen «Oberengadiner Jodelchörli». L’eveniment ha attratg er ina pluna giasts ch’èn rivads a Puntraschigna per giudair il chant da jodel en la baselgia San Niculò e davant il center da congress Rondo.

Er insatge per l’egl

Tipic per il di grischun dals jodladers 2016 èn er ils costums da tut las colurs pussaivlas. Dasper il costum da lavur grischun, èn stads represchentads bunamain tut ils chantuns da la Svizra cun in u l’auter costum.

Betg tipic per l’Engiadina

En sasez na tutgia il chant da jodel betg tar tut las regiuns, fin avant 28 onns era betg tar l'Engiadina. Entant saja quai dentant simplamain ina chaussa dal cor, ha declerà il president dal comité d’organisaziun, Theo Cavegn. Ins pudess er dir ch’i sa tracta d’ina sort Swiss Miniature, nua che persunas sa chattan che han simplamain plaschair dal chant.

Cumenzà or d’in jux

Edwin Federspiel è sa decidì avant paucs mais, da cumenzar a chantar tar il cor da jodladers d’Engiadin’Ota. Che quai saja simplamain stà in’idea spontana dad el. Uss saja surtut d'emprender ordadora ils texts per pudair chantar las melodias senza agid.

Pli auta jodladra da la Svizra

Da la partida a l’inscunter annual è era stada Karin Niederberger, la presidenta da l’Uniun federala da la jodladers. Per ella stat surtut la cuminanza ed il chant en il center tar tut ils inscunters da jodladers.

Mauns en giaglioffa

Ch’ils chantadurs tegnan lur mauns en giaglioffa durant il chant per rivar da chantar er ils tuns pli auts, saja be ina fama. La raschun ch’ils mauns èn zuppads durant il chant saja dentant quella, ch’ils purs en lur vestgadira da dumengias, avevan savens betg mauns uschè nets ed ils zuppavan perquai en giaglioffa.

In dals puncts culminants da l’inscunter annual questa giada en Engiadina è stà il chant cuminaivel da tut ils jodladers sin il plaz avant il center da congress a Puntraschigna.

Artitgels legids il pli savens

Scrollar a sanestra Scrollar a dretga