Siglir tar il cuntegn

Header

video
Studi davart engrondiment da la Biosfera Val Müstair
Or da Telesguard dals 09.11.2018.
laschar ir. Durada: 2 minutas 55 Secundas.
cuntegn

Engiadina Il «Parc da natira Biosfera Val Müstair» duess vegnir engrondì

La Regiun Engiadina Bassa Val Müstair lascha elavurar in studi davart la realisabladad d'engrondir il Parc da natira Biosfera Val Müstair.

La finamira dal studi davart la realisabladad è d’evaluar il potenzial economic e dal svilup, sche l'entir territori dal vitg da Scuol e nov era quel dal vitg da Valsot sa participeschan al Parc da natira Biosfera Val Müstair. Il studi è vegnì incumbensà da la Regiun Engiadina Bassa Val Müstair e duess vegnir elavurà durant l’onn 2019 ensemen cun las gruppas d’interess cun integraziun da la populaziun dals vitgs pertutgads.

audio
Saira: Biosfera Val Müstair duess vegnir engrondida
ord Actualitad dals 09.11.2018.
laschar ir. Durada: 2 minutas 37 Secundas.

Las incumbensas d’in parc da natira èn il mantegniment e la revalitaziun da la natira e da la cuntrada. Ultra da quai duess in tal parc rinforzar ina economia perdurabla. Il «Parc da natira Biosfera Val Müstair» è oz in parc da relevanza naziunala e furma ensemen cun il Parc Naziunal Svizzer, e cun ina part dal territori dal vitg da Scuol, l’emprim reservat autalpin en Svizra cun label UNESCO.

Zernez na sa participescha betg

Schebain che la Regiun Engiadina Bassa è purtadra da questa incumbensa, na fa Zernez betg part al studi sez. Il motiv principal, tenor il president communal da Zernez, Emil Müller, saja la votaziun d'avant dus onns da betg far part al reservat da Biosfera Engiadina Val Müstair. Sco quai che Müller ha ditg envers RTR saja era da respectar questa decisiun democratica. Sch’ins vesia dentant ch’il studi mussia in potenzial economic era per la vischnanca da Zernez, sperian ins dad pudair far part al project anc pli tard.

Plinavant saja la vischnanca da Zernez fitg cuntenta cun la situaziun actuala, quai per motiv, ch’ina gronda part da lur territori tutgia gia oz tar il Parc Naziunal Svizzer.

RR Novitads 12:00 +

Artitgels legids il pli savens