Siglir tar il cuntegn

Header

Navigaziun

Legenda: Guardar il video In cabel ultra svelt duai segirar il futur da l’Engiadina. Durada 03:35 minutas.
Or da Telesguard dals 27.01.2016.
cuntegn

Engiadina Il salvament vegn tras lingia da vaider

Cun las uscheditgas regiuns periferas vai pauc bain, uschia era cun l’Engiadina Bassa. Perquai ha «Mia Engiadina», ina pitschna gruppa d’entusiasts prendì en maun da stgaffir soluziuns per l’Engiadina. Lur soluziun: cumbinar ina rait da fibras da vaider cun il basegns da viver da l’uman d’ozendi.

Sin lur bindera stat «Mia Engiadina» e sut quel motto tschertgan els intensivamain perspectivas per l’Engiadina. Cun ina grond’ambiziun ed ina pitschna gruppa dad Engiadinais e Randulins (Engiadinais che turnan adina puspè en lur val) han els cumenzà quella tschertga avant trais onns.

Il terz lieu - ina maniera da viver sco schlantsch economic

Il turissem, di Jon Erni, in dals iniziants da «Mia Engiadina» è claramain l’emprima pitga economica en la val.Sper quel less sia gruppa dentant fabritgar si ina segunda pitga.

Lur inspiraziun è la maniera da viver da divers proprietaris da segundas abitaziuns. Quels lavuran savens directamain davent da lur da chasa sin temp en Engiadina e cumbineschan uschè recreaziun e lavur en in lieu, a lur terz lieu. Quai vul dir: Els han in emprim lieu, il da chasa, in segund lieu, il biro ed in terz lieu, in da chasa sin temp cun colliaziun al mund da lavur.

Legenda: Guardar il video «Mia Engiadina» ils indigens na conuschan anc betg propi il project. Durada 03:30 minutas.
Or da Telesguard dals 28.01.2016.

La fibra da vaider – il salvament or da la beschla

La clav per quel model da viver è la digitalisaziun. Perquai vul «Mia Engiadina» metter ina rait da fibras da vaider ch’empermetta in transfer da datas fin a 50 giadas pli svelt che quel actual.

La rait duess colliar gia quest onn 50 differents lieus cun public W-lan. En il proxim decenni duajan vegnir colliadas 85% da tut las chasas en la regiun.

Il martgà virtual – la plattafurma per far a raps l’idea dal terz lieu

La rait da fibras da vaider è la basa per vender il model dal terz lieu era a terzs, numnadamain a firmas grondas e pitschnas en tut la Svizra e l’exteriur. Il concept: las firmas tramettan lur collavuraturs en Engiadina nua che quels pon, grazia a la rait ultra-svelta, lavurar en in ambient da recreaziun. Ina app ha la rolla da plattafurma da vendita, da martgà virtual, nua che tut las purschidas pon vegnir organisadas e cumpradas tenor basegn individual.

Enfin oz fan gia nov affars engiadinais, dal ospital sur il Parc Naziunal enfin a l’hotel, part a quest martgà virtual.