Atgnamain èn els otg musicants, ma tar la fundaziun avant radund trais onns eran els mo en set commembers, uschia è restà il num dals set nanins. Tar ina da las emprimas occurrenzas musicalas han els stuì sa decider per in num.
Perquai che nus eran il cumenzament en set, avain nus decis per «Ils 7 nanins da Scuol».
Tranter ils musicants datti daquels ch'han suenter divers onns puspè cumenzà a sunar l'instrument ch’els avevan deponì en stgaffa. In dad els, quasi l'otgavel musicant, ha schizunt cumenzà senza enconuschientschas musicalas, agiunta il manader musical Nicolo Bass.
El descriva la fundaziun da la gruppa sco «idea da vinars». Malgrà questa partenza saja l'entira istorgia ina da success. La finamira centrala saja da divertir e derasas ina buna atmosfera.
Far plaschair ad autra glieud è il pli bel ch'ins po far.
La musica ch’els sunan è adattada oravant tut per festas da divertiment e per partis. Ultimamain han els perfin registrà dus tocs ensemen cun in producent a Sent. In toc è in dals «Fäaschtbänkler» e l'auter in ch'il cumponist grischun Flavio Bundi ha scrit per ils 7 nanins da Scuol.
