Siglir tar il cuntegn
cuntegn

Engiadina Ils emprims na gudognan betg adina

Era sch’ils responsabels dal Cor viril da Samedan èn stads ils emprims per reservar a temp stanzas a Chiavenna, n’han ils chantadurs engiadinais tuttina betg alloschi direct en la citad taliana durant la festa da chant chantunala extra muros.

Legenda: Tadlar il audio Dus giadas disfortuna tar alloschi. Durada 02:03 minutas.
02:03 min, Actualitad dals 05.06.2018.

Ils chantadurs dal Cor viril da Samedan han lur lieu per durmir paucas minutas cun l’auto davent da Chiavenna sez. Sco che Jon Fadri Huder, il co-president d’organisaziun Rezia Cantat e commember dal cor engiadinais ha declerà, haja la reservaziun da la stanzas d’hotel funcziunà fitg bain avant bun dus onns.

Reservaziun dubla

Nov mais avant Rezia Cantat ha il co-president dentant survegnì in telefon da l’hotelier a Chiavenna. Sia nova: el haja empermess las stanzas er ad in cor dal Surmeir e reservà senza vulair dubel las chombras. Per il Cor viril da Samedan saja stà difficil da chattar tuttina anc in alloschi almain en vischinanza dal lieu da festa. Finalmain haja quai dentant funcziunà.

Tuts na vegnan segir betg a duvrar lur chombra d’hotel, auter che per far ina duscha :)
Autur: Jon Fadri Huderco-president Rezia Cantat

Entant s’haja chattà alloschi per tut ils 3’400 chantadurs, ha confermà Huder. Er ils radund 500 participants a la festa da chant, ch’avessan gì dimora en la Val Spleia a Madesimo. Suenter la bova n’èn quels hotels betg pli cuntanschibels regularmain, uschia ch’ins ha chattà auters hotels en vischinanza da Domaso al Lai da Como.

Gia fatg experientscha a Trun

Reservar a temp stanzas d’hotel e finalmain tuttina betg avair alloschi en quel lieu, enconuschan ils chantadurs da Samedan dal reminent bain avunda. Uschia aveva Jon Fadri Huder reservà chombras gist suenter ch’el aveva udì en il radio che la festa da chant chantunala saja a Trun. La fin finala ha il Cor viril da Samedan gì da ceder las stanzas a favur d'auters participants da la festa. Ils Engiadinais han lura pernottà en in hotel a Mustér.

RR actualitad 07:00