La fabrica da l'Ovra electrica cuminaivla En, il «Gemeinschaftskraftwerk Inn» GKI, ha da cumbatter cun grondas sfidas. L'emprim avevi dà problems cun la firma da construcziun da l'ovra sur il cunfin tranter la Svizra e l'Austria. Uss fa la geologia problems, scriva la GKI en ina communicaziun a la publicitad.
Entant che la centrala a Prutz en l'Austria vegn a fin anc l’onn 2018, datti tar ils ulteriurs plazzals da fabrica, numnadamain tar la realisaziun da la lingia da pressiun ed il mir da serra a Martina retards considerabels.
La lingia da pressiun
La lingia vegn ad esser 21,4 kilometers lunga. Radund 9 kilometers èn realisads. Las duas maschinas «Zauberbohrer» e «Magliadrun» ston cumbatter cun la geologia e cun ina nauscha qualitad nunprevisa dal crap. Dapi il december stattan quellas 2 maschinas airi. Mintga mais chaschuna quai a la GKI custs da radund 1 milliun francs per maschina. Novas mesiras duessan ussa però procurar per damain incaps.
Il mir da serra
Era la construcziun dal mir da serra è bloccada dapi l’entschatta dal 2018, pervi da mancos da segirezza. Las raits da segirezza sur il plazzal èn emplenidas cun naiv e donnegiadas. Quellas ston vegnir renovadas.
Tar il project cuminaivel svizzer-austriac sa tracti actualmain da la pli gronda ovra electrica da quest gener che vegn fabritgada en las regiuns alpinas. Cun retards e cumplicaziuns nunspetgadas èsi da far quint, uschia ils responsabels. L’avertura è previsa per la fin dal 2020.
12:05 RR actualitad / 17:40 Telesguard