Lieu d’inscunter per la festa da cumià è stada la staziun da Zernez. Cun in cortegi tras la vischnanca ha cumenzà l’act festiv. Al timun dal til eran ils musicants da la societad da musica Zernez, gist suenter las 39 bandieras da tut ils circuls dal chantun Grischun. Politichers da vischnanca, politichers chantunals e schizunt naziunals han escortà ellas - tranter dad els surtut vegls mastrals, landammas e presidents cirquitals.
Zernez ha vivì in mument emoziunal ed istoric
Ina davosa giada han las bandieras dals singuls circuls sventulà en il vent cun accumpagnar il cortegi sin la plazza da festa tar il chastè Wildenberg-Planta. Quai era in mument emoziunal per blers preschents.
La populaziun grischuna aveva decis il matg 2009 dad abolir ils circuls. Ils 31 december 2015 è quella decisiun ida en vigur.
In cudesch en memoria
Betg en emblidanza va quest’era politica era grazia a Florian Hitz da l'Institut grischun per la perscrutaziun da la cultura che ha edì il cudesch «Kreise ade, circuls adia, circoli addio». In cudesch illustrà cun bun 200 fotografias ed artitgels en tuttas trais linguas chantunalas. Preschentà vegn anc ina giada mintgin dals 39 circuls.
Cun la refurma da territori èn ils circuls istorgia. A partir dal 1. da schaner 2016 datti anc 11 regiuns en il chantun Grischun.
RR actualitad