Jaques Guidon è naschì ils 22 da fanadur 1931, e sia uffanza ha el passentà a Zernez. Silsuenter ha el fatg il seminari a Cuira, e lura cuntinuà cun il studi da magister secundar a Turitg. Scola secundara ha Jacques Guidon lura dà durant 30 onns a Zuoz. A partir dal 1984 è el s'engaschà en incumbensa da la Lia Rumantscha sco collavuratur regiunal.
Dasper la professiun è Jacques Guidon era stà in pictur d'art fitg activ, là è el s'exprimì en in stil abstract. E sco autur ha el scrit dramas, raquints, aforissems, satiras e gieus festivs. Betg d'emblidar è la revista satirica «Il Chardun», che Jacques Guidon ha fundà il 1971. Passa 1'200 texts e caricaturas ha el scrit e dissegnà. La revista ha purtà bleras tematicas politicas, da dunnas, da l'ambient e dal turissem – ed è uschia stada ina plattafurma per vuschs criticas e persunas ch'èn s'exponidas cun lur posiziuns magari piztgantas.
