Ils skelets da roma per dus stupas da glatsch stattan entant sin il prà vis-à-vis da la staziun da tren Morteratsch. Ulteriurs otg duain sche pussaivel suandar anc avant che la naiv riva. Cun quai duai crescher «la pli bella vischnanca da glatsch en Svizra». Quai en mintga cas il giavisch dal glaziolog Felix Keller.
Ils stupas da glatsch duain en emprima lingia sensibilisar per la problematica da la mancanza d'aua. Els duain dentant era vegnir inscenads turisticamain, tranter auter cun excursiuns regularas che la vischnanca da Puntraschigna organisescha.
Il nov lieu ch'è accessibel cun auto e tren è per quest intent ideal. Il stupa ch'è vegnì installà l'onn passà en la Val Roseg saja stà memia lunsch davent per nizzegiar quel turisticamain, uschia Keller.
Reservuars d'aua
Inventà il stupa da glatsch ha l'inschegner Sonam Wangchuk da Ladakh en l'India. El ha survegnì per sia invenziun il Rolex Award for Enterprises l'onn passà e collavura stretg cun il project a Morteratsch.
La finamira dal stupa è da rimnar aua durant l'enviern e crear ina sort da glatscher artifizial che serva la primavaira sco reservuar d'aua.
RR actualitad 17:00