Siglir tar il cuntegn

Engiadina In Zernezer gida en Nova Zelanda

Ilario Roner è a Christchurch per gidar a reconstruir la cità ch’è vegnida destruida avant bunamain quatter onns e mez dad in terratrembel. Anc adina èn da vesair ils gronds donns.

Ilario Roner da Zernez è dapi il mars en la Nova Zelanda a Christchurch. Il giuven marangun da 22 onns è plazzà per in onn d’ina firma che gida a reconstruir la cità.

Terratrembels tutgan tar il mintgadi en la Nova Zelanda. I dat adina puspè pitschens terratrembels. Quai ha era Ilario Roner stuì constatar:

L'emprim hai jau gì il cor en las chautschas.
Autur: Ilario Roner

Da ruinas e vias destruidas

En il center da la cità ves’ins ils pli gronds donns. Dapertut èn anc adina ruinas da chasas, e las bleras ch’èn anc entiras na sun betg pli stabilas avunda. Per stabilisar quellas chasas han ins mess containers vida las fatschadas per che quellas na rumpian betg ensemen. Era singulas vias èn anc adina destruidas, uschè ch’ins na sa betg passar culs autos. I dat perfin persunas ch’abitan dapi il terratrembel en provisoris.

Ina schanza per Christchurch

La cità da Christchurch emprova da far il meglier or da la situaziun. Els nizzegian la reconstrucziun per fabritgar tut pli modern e pli stabil. Ussa en ins a mesa strada dal temp da reconstrucziun. Ins quinta che las lavurs duran en tut anc ina giada var 4 onns.