Il recurrent aveva pernottà il settember 2019 sin in parcadi public, sin terren da la vischnanca da Scuol. Tenor lescha da polizia n’è quai betg lubì. Il policist communal ha perquai dà ina multa da 70 francs al manischunz da l'auto-rulotta. Quest chasti n’ha el betg pajà, uschia ch’il cas è arrivà avant Dretgira administrativa a Cuira.
Tribunal federal conferma sentenzia
La Dretgira administrativa ha dà raschun a la vischnanca da Scuol. Il recurrent ha silsuenter tratg vinavant il cas avant Tribunal federal. Quel ha uss confermà en sia sentenzia dals 17 da mars 2021, che la multa saja giustifitgada.
Empè da 70 passa 3’000 francs
Il manischunz da l'auto-rulotta, ch’aveva argumentà da simplamain avair parcà il vehichel tenor prescripziuns sin in parcadi public senza campar, ha uss da pajar sper la multa da 70 francs da la vischnanca da Scuol, ils custs administrativs da la Dretgira administrativa ed er ils custs dal Tribunal federal da 3’000 francs, pia total radund 3’500 francs.
