Georg Luzzi fa in pèr uras visita sin il campadi Sur En. La gievgia en damaun enturn las 8 èsi anc quiet. Il mainagestiun dal campadi Wolfgang Bosshardt è dentant gia en acziun e dat pled e fatg. Dapi 35 onns fa el questa lavur, el ha surpiglià l'affar da ses bab che ha realisà il campadi ils onns 1968/1969.
Il grond travasch da la stagiun da stad 2024 è passà, igl è gia in zic quiet, e Wolfgang Bosshardt è cuntent cun l'andament. Il campadi Sur En funcziuna in pau different ch'auters – era perquai che la glieud po eleger sezza il plaz ed uschia er ils vischins.
In vischin dal campadi fitg ruassaivel è il mument l'En. Ed era sch'il flum maina ina giada u l'autra bler dapli aua, Wolfgang Bosshardt n'ha betg bler tema sch'el vesa prognosas nauschas da l'aura. Tenor il schef dal campadi ha la vischnanca entant plans pli concrets per proteger pli ferm il territori.
Il far vacanzas
Vacanzas sin in u l'auter campadi, quai fa Wolfgang Bosshardt era sez. Cun ses camper è el sin viadi tar sedutas da l'associaziun svizra da campadi. Dentant el giaudia era in pau cun esser sin ses campadi – là nua ch'auters fetschian gea vacanzas.
Duas persunas che fan regularmain vacanzas sin l'areal en l'Engiadina Bassa, e quai dapi otg onns – èn Beni e Barbara Engler. Els vegnan dad Egg en il chantun Turitg ed han dus uffants. Els giaudan che las reglas da campar n'èn betg uschè strictas, per exempel cun plazzar il camper ubain cun far fieu. La famiglia Engler è da tuttas stagiuns sin il campadi, e vesan cunzunt ils avantatgs che quel porscha. Ina reminiscenza che ha fatg impressiun e ch'els han vivì direct è stà il ferm suffel dal zercladur 2020. Quel aveva da lezzas uras devastà il parc da sugas en vischinanza.
