Siglir tar il cuntegn
Inhalt

Engiadina Incaps tar l’arriv dals emprims fugitivs en Val Müstair

14 umens giuvens oriundamain da l’Eritrea èn arrivads dal center per requirents d’asil a Laax cun in bus sur il Pass dal Fuorn a Valchava en Val Müstair.

Legende: Video Arrivada da fugitivs en Val Müstair abspielen. Laufzeit 02:15 Minuten.
Or da Actualitad video dals 30.11.2015.

Suenter che l’emprima reacziun dals fugitivs n’è betg gista stada euforica cura ch’els èn arrivads avant la Chasa Muntanella, è la situaziun finalmain sa sclerida suenter plirs telefonats cun l’Uffizi da migraziun e da dretg civil.

Entaifer paucs mais midà 4 giadas locaziun

Ils requirents d’asil èn, sco in dad els ha declerà en englais, tuts da l’Eritrea ed han gì da midar locaziun gia quatter giadas entaifer paucs mais. Uss sajan els arrivads en ina val laterala, lunsch davent da tut e tuts en in pitschen lieu senza grond’infrastructura e pussaivladads per cumprar en e tgirar il contact cun confamigliars ed amis.

Populaziun vegn infurmada la gievgia

Entant han ils umens però retratg lur nov dachasa transitoric en la Chasa Muntanella ch’era oriundamain in champ da vacanzas. Il manader da quella, Werner Braun, è persvas ch’el vegn dad organisar cun agid dal chantun tut il manaschi. En tut duessan avair dimora bun 50 fugitivs en la Chasa Muntanella.

La populaziun da la Val Müstair duess vegnir infurmada ils 3 da december 2015 dal chantun e da la vischnanca davart ils detagls dal nov center per fugitivs a Valchava.