La «reglamentaziun da la lingua ufficiala in Engiadina Bassa» è ina cunvegna intercommunala davart il diever dal rumantsch. Radunanzas vegnan manadas per rumantsch, l’administraziun succeda da princip per rumantsch, las scolas èn rumantschas ed era inscripziuns publicas ston esser rumantschas.
Questa cunvegna è vegnida suttascritta il schaner 1996 e vala fin ils 31 december 2015. Ella sa prolunghescha automaticamain per 5 onns, sch'ella na vegn betg desditga almain in onn avant d’ina da las vischnancas. Quai n’è betg capità. Teoreticamain è la reglamentaziun anc en funcziun fin il 2020.
Dal tut na vegn betg suandada la reglamentaziun. Pliras inscripziuns publicas èn tudestgas. Las autoritads communalas èn conscientas da quai. Causa la fusiun communala avevan els autras prioritads che da controllar inscripziuns. Il president communal, Christian Fanzun, empermetta, ch'inscripziuns che cuntrafan a la reglamentaziun vegnan a stuair vegnir midadas.
RR Actualitad 08:00