Durant trais dis datti davos portas serradas lavuratoris, referats e discussiuns. Mintg’onn envida l’organisaziun er a pledaders e referents prominents in Engiadina. Tenor la «Bilanz» quinta il Forum tar in dals 5 ils pli impurtants eveniments da l’economia svizra.
Rudy Giuliani, Oliver Kahn....
Quest onn è per exempel da la partida l’anteriur president da New York, Rudy Giuliani, che quinta da tgeninas experientschas ch’ins possia profitar 15 onns suenter las attatgas dals 9 da settember 2001 in America. L’anteriur goli da ballape tudestg, Oliver Kahn referescha davart sia filosofia da success.
Per in program accumpagnant sper ils referats e lavuratoris porscha il Forum SREF differentas pussaivladads als radund 400 participants. Per exempel ina sairada da gala cun Andreas Gabalier.
Prioritad han trategniment ed infurmaziun
Be a l’ur da l’eveniment hajan ins era temp da barattar adressas e discutar tematicas sco per exempel las consequenzas da la lescha che limitescha las segundas abitaziuns, ha declerà Christoph Caviezel, il patrun da l’interpresa d’immobiglias Mobimo ad RTR. Uschiglio giud ins simplamain duranttrais dis la purschida variada da referents, ils inscunters, las discussiuns e la lavur in gruppa durant ils lavuratoris.