Da questa opiniun è il president dal cussegl administrativ Jon Peer. Las chombras èn vegnidas modernisadas cun in agen bogn e tualetta, las stanzas cun la pli moderna tecnica ed era la stanza da mangiar è vegnida engrondida. Ussa spetgan anc installaziuns electricas e da segirezza da fieu, plinavant prevesan els era d’engrondir la purschida da sport. Tut ensemen vulan els investir 12 milliuns francs.
Nagina acquisiziun durant la fabrica
Per realisar l’infrastructura surmenziunada e per evitar problems logistics han ins tralaschà da tschertgar ulteriuras studentas e students durant la fabrica. Actualmain van 105 studentas e students a scola a l'Institut Otalpin.
Schlargiament da purschida – er per la regiun
Dapi dus onns fa l’institut Otalpin a Ftan part da la famiglia da scola globala d’education en moviment (EiM). Grazia a questa colliaziun globala han ins pudì lantschar il schaner 2023 il nov program «Ignite» cun 30 scolaras e scolars da la rait EiM internaziunala. Il program è ina cumbinaziun tranter aventura e scolaziun. Durant 12 emnas dessan uffants da tut il mund vegnir a far experientschas cun la scola ed era cun la natira e bestgas, insumma cun la vita in Engiadina. La finamira saja uschè dad augmentar il dumber da studentas e students en avegnir.
Sper la purschida internaziunala è er quella per Rumantschas e Rumantschs vegnida engrondida: Giuvenils da lingua rumantscha pon sper la maturitad bilingua tudestg/englais uss er far ina maturitad «Grischuna».
Duas persunas pli pauc en il cussegl administrativ
Christian Fanzun n'è betg pli en il cussegl d'administraziun da l'Institut Otalpin a Ftan. Sco motiv ha l'anteriur president communal da Scuol ditg ch’el n’haja betg pli ina carica politica en la regiun. Era sa retratg è Michael Budliger. Vinavant part al cussegl fan part Jon Peer (president) Gerhard Pfister (vice), Duosch Fadri Felix, Ursula Fraefel, Christian Gürtler, Hans Künzle e Fraser White. Il cussegl administrativ vegn elegì per in onn.
Durant l'onn da gestiun 2021/22 han ins sa focussà sin il project da renovaziun sco er sin la planisaziun da la nova purschida, uschia che la svieuta è sa sbassada. Tras la valurisaziun da l'immobiglia ed in credit èn la bilantscha ed il cash-flow dentant vegnids stabilisads.
Or da l'archiv:
