L’institut Otalpin Ftan aveva fatg recurs encunter l'aboliziun dal label. Quest recurs è ussa vegnì refusà da Swiss Olimpic e la decisiun è definitiva. La raschun principala che Swiss Olimpic ha prendì davent il label è che il numer da scolars da la classa da sport è memia bas.
L'institut Otalpin è ina da mo 5 scolas en Svizra che dastgava duvrar il label da Swiss Olimpic.
Per il manader da la classa da sport Mario Denoth è questa decisiun nunchapibla. Tenor Denoth mussan ils resultats dals atlets da la classa da sport che l’Institut Otalpin a Ftan è ina da las meglieras scolas da sport da la Svizra.
Memia paucs scolars cun carta da talent
Roger Schnegg, il directur da Swiss olimpic ha motivà la decisiun dad abolir il label envers RTR ina giada cun il numer da scolars che han ina carta da talent. In criteri per il label saja in tschert numer da scolars cun in aut nivel sportiv. En pli stuess ina scola cun il label da Swiss olimpic era esser prevesida sco center da prestaziun naziunal da Swiss Ski e quai na saja era betg il cas.
Gia avant 4 onns haja Swiss olimpic fatg cler a l'Institut Otalpin a Ftan che ils criteris na sajan betg ademplids. Ussa avess la scola stuì avair fatg las correcturas necessarias e quai na saja betg il cas tenor Roger Schnegg.
RR novitads 18.00