In onn e dus mais ha durà il viadi vers la libertad. In temp che Hannibal Gurja n’emblida betg pli. Oravant tut en la Libia ha el passentà in ad in la crudelitad ed il privel d’ina tala fugia. Tut saja dentant stat meglier che viver vinavant en l’Eritrea. In pajais che vala fin oz sco terra fitg instabil, senza constituziun e renconuschientscha dals dretgs d’umans.
Entant è la vita sa midada cumplettamain per Hannibal Gurja. Suenter esser stà a Basilea, Tavau e Cuira n’ha el ussa betg mo chattà in bun patrun da lavur mabain era ina nova patria. Quai en la Val Müstair tar il Center da sandà. Dus onns fa el là gia part da la squadra dal mantegniment. A l’entschatta anc sco praticant ed ussa sco emprendist. Sia finamira è clera; terminar cun success l’emprendissadi sco spezialist per il mantegniment dal manaschi e lura pudair viver quella vita ch’el s'imaginava gia sco giuven en l’Eritrea.