Ensemen cun ses collega da studi Tenzin Langdun ha Martin Oswald realisà in sistem per scuvrir pli spert cancer sin la glonda gronda, per tudestg Schilddrüse. L’um da 27 onns ha il bachelor en informatica ed è vidlonder da far il master. Per sia lavur da bachelor ha el collavurà cun medis da l’America e sviluppà in sistem ch'analisescha cun agid d’intelligenza artifiziala las cellas da la glonda gronda.
Il team american prepara las cellas retratgas da la glonda gronda e fotografescha quellas. Lura vegnan els cun lur sistem che analisescha la fotografia ed identifitgescha cellas pertutgadas da cancer grazia ad ina segmentaziun automatisada da cellas.
Per identifitgar cellas da cancer vegn duvrà ina metoda cun il num «Fluoreszenzpolarisation».
Cellas vegnan maschadadas en il labor cun in molecul pitschen che sa collia be cun cellas da cancer, betg cun cellas saunas.
Sch'ins drizza ina speziala glisch sin questas cellas, glischan quellas e pon uschia vegnir differenziadas da cellas saunas.
Il grond avantatg, tenor il student Martin Oswald, è il temp per avair il resultat. Fin oz avevan ins plirs dis per analisar, cun lur sistem han ins il resultat suenter 30 minutas.
Martin Oswald e Tenzin Langdun han gudagnà il Siemens Excellence Award 2023, in premi inizià da la firma Siemens. Plinavant èn els nominads per il LAP Sciences Award 2024, inizià dad ina fundaziun ensemen cun plirs partenaris che premieschan lavurs relevantas en la scienza da labor e diagnostica. Quest premi vegn surdà definitivamain in settember 2024.
