Malgrà la bassa participaziun da la terza occurrenza publica è la realisaziun da la strategia «San Murezzan 2030» tenor Thomas Bernhard, il cussegliader da project, sin buna via. Era il fatg che San Murezzan piglia insumma en consideraziun las ideas dals abitants tar in tal process politic na sa chapescha betg da sasez.
Suenter bunamain otg mais han ins definì differents accents principals, sco per exempel «San Murezzan SIN IL LAI», «San Murezzan PLAIN VITA» ubain «San Murezzan TOP SIN LA MUNTOGNA». Sper las occurrenzas publicas ha mintgin pudì inoltrar sias ideas e visiuns sur ina plattafurma digitala.
Era ils giuvens han gì pled en chapitel
Ina riva cun sablun al lai da San Murezzan, in parc dad uffants ord legos ubain in circus. Quai èn mo in pèr da diversas ideas ch’èn vegnidas menziunadas a la terza occurrenza publica dal project «San Murezzan 2030».
Per ina giada n’eran betg ils creschids en il center da quest inscunter mabain ils uffants. En il rom d’in project da scola han tut las scolaras ed ils scolars da la vischnanca numnadamain preschentà lur visiuns e giavischs per San Murezzan.
Per sviluppar enavant la strategia èn ils inputs dals giuvens gist medem impurtants sco las ideas dals creschids.
Tgi saja ussa la lezia dad el ensemen cun il gremi politic dad analisar ed interpretar questas ulteriuras ideas per adattar eventualmain la strategia finala. Fin la fin da quest onn duai quella alura esser pronta en furma d’in plan da master per la revisiun da la planisaziun locala da San Murezzan.
RR Actualitad