Siglir tar il cuntegn

Header

video
Il concurs da la firma Hohenegger en Val Müstair
Or da Telesguard dals 08.05.2017.
laschar ir. Durada: 2 minutas 16 Secundas.
cuntegn

Engiadina Interpraisa da fabrica Hohenegger ha annunzià insolvenza

Pel mument è instradà il proceder da concurs per l’interpraisa da construcziun Hohenegger a Fuldera, ina da las davosas en la Val Müstair.

Sco quai ch'il manader da l'Uffizi da scussiun regiunal Engiadina / Val Müstair, Arno Lamprecht, ha confermà envers RTR, saja l'interpresa Hohenegger en procedura da concurs. L’emna passada haja l’interpresa Hohenegger deponì la bilantscha.

audio
Falliment tutga la Val Müstair
ord Novitads dals 08.05.2017.
laschar ir. Durada: 2 minutas 41 Secundas.

Direcziun betg cuntanschibla

L’interpresa da construcziun cun sez a Fuldera n'è anc betg stada cuntanschibla. Tar Hohenegger lavuravan 24 lavurers – da quels eran 11 indigens.

Chattà soluziun per emploiads

Tenor ina communicaziun dals sindicats Unia e Syna surprenda l’interpraisa Foffa Conrad a Zernez ils lavurers per las medemas cundiziuns. Ils sindicats èn cuntents cun questa schliaziun, era sch'ils lavurers han ussa in viadi da lavur pli lung.

Grondezza sco schanza u privel

Foffa Conrad fa part dapi passa dus onns d’ina uniun d’intrapraisas da construcziun pli gronda. Da quella fan part tranter auter la Bezzola Denoth SA, la Laurent SA, Hartmann SA, Zeblas Bau SA, la Christoffel Bau SA e la Foffa Conrad SA.

Segund il schef da persunal da la Foffa Conrad SA, Georg Fallet, saja stat pussibel da far in offerta d’agid per il persunal da la Hohenegger SA be grazia a la grondezza da lur uniun e che la situaziun da lavur na saja uschè mala sco auters onns.

Il president communal dal da Val Müstair, Rico Lamprecht, vesa era varts negativas da quest svilup sin il sectur da construcziun. Uss datti be pli ina intrapraisa da construcziun en la Val Müstair. Segund el manca uss la concurrenza e la schelta.

RR actualitad 11:00

Artitgels legids il pli savens